Qatar terma jamoasi bilan bor-yo‘g‘i 10 oy ishlagan Karlos Keyrush kuni kecha o‘z lavozimini tark etganidan xabaringiz bor.
Ushbu murabbiy Eron terma jamoasi bosh murabbiyi sifatida o‘zbek muxlislari orasida qo‘rqinchli xotiralar bilan eslanadi. Lekin Keyrush Eronda o‘tkazgan 8 yillik faoliyatidan so‘ng, hech qaysi terma jamoada uzoq ushlanib qolmadi.
Erondan keyin Kolumbiya terma jamoasini boshqargan portugaliyalik murabbiy, JCH-2022 saralashida Ekvadordan uchralgan 1:6 hisobidagi sharmandali mag‘lubiyatdan keyin ishdan olingan edi.
Keyinchalik Muhammad Salah yetakchiligidagi Misr terma jamoasi bilan ham JCH-2022 ga chiqish vazifasini uddalay olmadi. Hattoki muxlislarimiz orasida unchalik xushlanmaydigan Ektor Kuper ham Misrni 2018 yilgi JCHga olib chiqish vazifasini eplagan edi.
Eron terma jamoasi esa JCH-2022 boshlanishidan oldin, saralashni muvaffaqiyatli o‘tkazgan Dragan Skochichga chiqish eshiklarini ko‘rsatgan holda, saralashda bir emas, ikkita terma jamoa bilan muvaffaqiyatsizlikka uchragan Keyrush bilan Qatarga yo‘l oladi. Keyin Qatarda nima bo‘lganini o‘zingiz yaxshi eslasangiz kerak.
Mana endi Osiyoning amaldagi chempioni - Qatar terma jamosi bilan 11 uchrashuvda bor-yo‘g‘i 4 ta g‘alabaga erishgan Keyrush, arab futbolchilari bilan til topisha olmasdan, o‘z lavozimini tark etishga majbur bo‘lmoqda.
Karlos Keyrushning kuchli murabbiy ekanligiga hech qanday shubha yo‘q. Buning ustiga, uning ishiga baho berish bizga qolgan emas. Lekin har bir murabbiyning faoliyatida o‘ziga ideal tarzda mos tushadigan jamoasi bo‘lar ekan. Eron terma jamoasi - Keyrush uchun yaralgan jamoa edi va endi Keyrush o‘zi uchun boshqa "Eron" topa olmasa kerak.
