Муборакнинг "Машъал" футбол клуби академиясининг мамлакатимиз футболи ривожида ўзининг муносиб ўрни борлигини ҳамма яхши билади. Қайси жамоага назар солманг, "Машъал" футбол мактаби тарбияланувчисини кўрасиз. Суҳбатдошимиз Дилшод Андаев ҳам шу клуб вакили эканидан жуда фахрланади.

Мамлакатимиз мустақилликка эришгач футболга берилаётган катта эътибор, яратилаётган шароитлар хуллас, барча хайрли ишлар энди ўз мевасини бера бошлади. Шунингдек, бунга жавобан ҳар қайси соҳада бўлгани каби, футболда ҳам Дилшод Андаевдек ўз ишини фидойилари кўпаймоқда.

У аввало “Машъал”да футболчи сифатида, оғир жароҳатдан сўнг эса ёшларга мураббийлик қилиш билан анча йиллардан бўён “Машъал” клубида фаолият юритиб келмоқда. Ҳозирги кунда ҳам ушбу мутахасис 1995-96 йилда туғилган ёш футболчиларга устозлик қилиб келади.

Бугун унинг шогирдлари номдор жамоаларда айниқса терма жамоаларимизда ўйнаб, халқаро мусобақаларда ватанимиз шаънини ҳимоя қилишмоқда. Хўш, айтингчи, бундан унинг фахрланишига ҳаққи борми? Албатта бор.

Биз бугун унинг шогирдлари Қашқадарё вилояти ҳокими кубоги мусобақасининг финали йўлланмасини қўлга киритгач, суҳбат қилишга қарор қилдик (суҳбатимиз 1 февраль куни бўлиб ўтган – муаллиф изоҳи) .

— Бугунги ғалаба ва мусобақа финали йўлланмаси билан Сизни ва шогирдларингизни самимий табриклаймиз!
— Раҳмат, шогирдларим берган кўрсатмаларимни камчиликсиз бажаришиб, мана шундай ютуқни қўлга киритишди. Улар ёш бўлишларига қарамасдан, клубимиз юзини ерга қаратмаганидан жуда хурсандман. Сафимизда ўз ёшига муносиб, Аббосов, Шукуров ва Қиличев каби, терма жамоа аъзолари бор, улар бугун ҳам ўз маҳоратларини намойиш этишиб, ғалабамизга муносиб ҳисса қўшишди.

— Эртага финалда “Насаф” ўринбосарлари билан баҳс бўлади, жамоангизни ушбу учрашувда ҳам ғалаба қилишига ишонасизми?
— Бу футбол, футболда ҳар қандай натижа бўлиши мумкин, эртага бўладиган финалда ҳам албатта ғалаба учун майдонга тушамиз. Аммо финалда кўпгина тажрибали ўйинчиларимиз майдонга туша олишмайди. Бугун сафимиздаги 1995 йилда туғилган 10 та аъзоларимиз Алексей Естафеев ва Мочиновлар қўл остидаги терма жамоа томонидан таклиф олдилар, биз уларни Тошкентга терма жамоа ихтиёрига кузатиб қўйдик.

— Демак, жамоангиз анча кучсизланиб қолибдида?
— Йўқ, бундан хавотирланмайман, бизда маҳоратли тарбияланувчиларимиз етарли. Бизда ҳеч қачон бунда узилиш бўлмайди, эртага кўпроқ 1996 йилда таваллуд топган шогирдларим майдонга тушишади, ўйлайманки, улар ҳам ғалаба қилиш учун бор кучларини аяшмайди.

— Сиз ўтган мавсумда “Машъал”нинг ўринбосарларига ҳам устозлик қилдингиз, афсуски, янги мавсумда “Машъал” биринчи лигада фаолият юритадиган бўлди, ўзингизга маълум биринчи лигада ёшлар жамоаси бўлмайди, улар мунтазам футбол ўйнашлари керак...
— Сизни тушундим. Бизда ўринбосарлар жамоаси асосан 1995-96 йилда таваллуд топган академиямиз тарбияланувчиларидан ташкил топган. Ҳозирги кунда уларни ўйин амалиёти давомийлигини таъминлаш тўғрисида бош қотираяпмиз, ўйлайманки, биронта вилоят миқёсида бўладими ёки туман даражасидаги лига бўладими, уларни иштирокини таъминлаймиз, ҳозирча бу қанақа лига бўлиши менга қоронғу.

— Шогирдларингизга доимо бошқа клублардан таклифлар тушиб турса керак?
— Ҳа, таклифлар бўлиб туради, бу йил шогирдларимга “Насаф”, “Пахтакор” ва бошқа клублардан таклифлар бўлди. Албатта бу бир томондан қувончли ҳам, иккинчи томондан озроқ хафа ҳам қилади, чунки шунча йил уларни тарбиялайсан-да, энди натижасини кўраман деганда, бошқа жамоага кетиб қолишади. Бу сафар шогирдларим клубимизда қолишга қарор қилишди. Бундан кўнглим анча кўтарилди. Ишончим қатъийки, “Машъал” келаси йил албатта олий лигага қайтади ва шогирдларим клубимизнинг юқори мақсадларини амалга ошишига ўз ҳиссаларини қўшишади.

— Клуб академияси ва ўринбосарлар жамоаси олдидаги муҳим вазифа асосий таркибга ўйинчилар етказиб бериши керак, бу йил қайси шогирдларингиз асосий таркибдан жой олди?
— Бу йилдан асосий таркибда тарбияланувчиларимиздан Шукуров Отабек, Қиличев Шоҳжаҳон, Аббосов Шоҳжаҳон, Абдиев Аслиддин ва Элдорбек Шомуродов фаолият олиб боришади.

— “Машъал”нинг ўтган йилги муваффақиятсизлигидан раҳбарият керакли хулоса чиқарди деб, ўйлайсизми?
— Ўтган мавсумдаги “Машъал” футбол клубининг муваффақиятсизлиги биз учун жуда катта сабоқ бўлди. Клубимиз фаолияти чуқур таҳлил қилинди. Ҳозирги кунда клубимиз раҳбарияти клубнинг кўп йилга мулжалланган концепциясини ишлаб чиқишмоқда. Агар биз ушбу концепциямизни ҳаётга тадбиқ қилишни йўлга қўйсак, бу албатта ўзининг ижобий натижаларини беришига ишонаман. Бу концепциянинг энг асосий бандларидан бири келгусида клубимизни барча керакли кадрлар билан ўзимизни ўзимиз таъминлашни йўлга қўймоқчимиз, ҳар бир ходимимизни футболи тараққий этган мамлакатлар тажрибасини ўзлаштиришларини амалга оширмоқчимиз. Клубимиз молиявий аҳволидаги муаммолар бартараф этилмоқда, ҳаммаси ижобий томонга ўзгарган.

Бизнинг олдимизда катта ва эзгу мақсадларимиз бор. Ана шу мақсадларни рўёбга чиқариш учун тинмай меҳнат қилаверамиз. Ўзимча Муборакни, “Машъал”ни фабрикага қиёслагим келади. Шундай десак, фабрика фаолият юритишда давом этмоқда. Сифатли “маҳсулотлар”имиз жонажон мамлакатимиз футболи равнақига ҳисса қўшаверади. Клубимизда вояга етган ҳар бир тарбияланувчимиз – бизнинг фахримиздир!

Суҳбатни Ренат Эрназаров олиб борди.