Осиё кубоги нимчорак финалидан ўрин олган тўртинчи ўйин бўлиб ўтди. Мусобақа мезбони Қатар терма жамоаси Фаластинга қарши майдонга чиқиб, иродали ғалабани қўлга киритди.

Фаластинликлар биринчи бўлимда яхши ўйин намойиш этишди. 37-дақиқада Қатар ҳимоячисининг хатосидан фойдаланган Одай Даббағ дарвозани ишғол қилди.

Майдон эгалари эса биринчи таймга қўшиб берилган 7-дақиқада ҳисобни тенглаштиришди. Қатарликлар бурчак зарбасини чиройли тарзда амалга оширишди ҳамда Ҳасан ал-Ҳайдос тўпни дарвозага жойлади.

Иккинчи бўлим бошида Қатар пенальти тепиш ҳуқуқини қўлга киритди. Акром Афиф ундан самарали фойдаланиб, жамоасини олдинга олиб чиқди. Бу Афифнинг турнирдаги тўртинчи голи бўлди.

Ўйин охиригача ҳисоб ўзгармади ва Қатар чорак финалга чиқди. Бу жамоага 1/4 финал босқичида Ўзбекистон-Таиланд ўйини ғолиби рақиб бўлади.

Осиё кубоги, 1/8 финал
Қатар – Фаластин - 2:1 (1:1)
Голлар: 0:1 – 37 Даббағ, 1:1 – 45 Ал-Ҳайдос, 2:1 – 49, пенальти Акром Афиф.
Қатар – Баршам, Ро-Ро, Лукас Мендес, Хухий (Салмон, 46), Ар-Ровий (Ал-Жанҳий, 46), Абдулваҳоб, Жобий (Али, 89), Фатахий, Афиф, Ал-Ҳайдос (Хатем, 59), Али.
Фаластин – Ҳамадий, Солиҳ, Терманиний, Сальданья, Мхагна, Харуб (Бассим, 75), Ал-Баттат, Сейям (Батран, 58), Даббағ, Кунбар (Қумбор, 83), Абу Варда.
Огоҳлантиришлар: Сейям (15), Солиҳ (48), Мхагна (85).