"Барселона" аёллари жамоаси сўнгги 5 йил ичида илк бор ўз уйида мағлуб бўлди.
Бу Чемпионлар лигасининг биринчи ярим финалида "Челси"га қарши ўйинда (0:1) юз берди. Эрина Катберт 40-дақиқада ғалаба голини киритди.
Каталония жамоаси Испания чемпионатида "Спортинг"га ютқазиб қўйган 2019 йилнинг февраль ойидан бери ўз уйида мағлуб бўлмаётганди.
Бундан ташқари, "Барселона" 2022 йилнинг апрелидан бери илк бор ўйинни гол урмасдан якунлади. Охирги марта Чемпионлар лигаси доирасида "Вольфсбург"га қарши ўйинда (0:2) шундай бўлганди.
Шунингдек, бу жамоанинг жорий мавсумдаги барча мусобақалардаги илк мағлубиятидир. "Челси" билан учрашувгача "Барселона" 37 учрашувда 35 ғалаба ва иккита дуранг қайд этган.
