“Локомотив-БФК” жамоаси билан бўлган ўйиндан сўнг Азамат Абдураимов футболчиларга икки кунлик дам берди. 3 апрель куни жамоа аъзолари клуб базасига йиғилиб, мамлакат Кубоги доирасида “Локомотив”га қарши ўйинга тайёргарликни бошлади. Эътиборлиси, бугун жамоа сафига Асқар Жадигеров ҳам келиб қўшилди. Бу йил фаолиятини “Андижон” жамоасида давом эттиришга қарор қилган тажрибали ярим ҳимоячи жароҳатдан кейин тикланиш жараёнини ўтказаётганди. Шу сабабли Жадигеров мавсум бошида таркибда эмасди.
Ниҳоят бугун у Тошкентдан Андижонга келди. Мухлисларга яхши маълумки, Жадигеров 2002-2003 ва 2008-2009 йилги мавсумларда “Андижон” шарафини ҳимоя қилганди. Маълум муддатли танаффусдан сўнг Асқар яна қадрдон жамоасига қайтди. Тажрибали ярим ҳимоячи жорий мавсумда “Андижон”ни олий лигага қайтишига ўз ҳиссасини қўшишни мақсад қилган.
“Локомотив”га қарши тайёргарликни бошлаган жамоамиз бугун куннинг иккинчи ярмида Шўрбулоқда жойлашган футболга ихтисослаштирилган мактабнинг сунъий майдонида машғулот ўтказди. Бугунги машғулотда Жадигеров ҳам иштирок этди. Асқар ўзининг дастлабки ўйинини 6 апрель куни “Локомотив” клубига қарши ўтказиши мумкин.
