Wе Global Football портали Ўзбекистон миллий жамоасининг 2026 йилги Жаҳон чемпионатига чиқиш имкониятини 76 фоизга баҳоламоқда.

Манбага кўра, Қирғизистон устидан меҳмонда эришилган 3 очкодан сўнг Сречко Катанес шогирдларининг 2026 йилги Жаҳон чемпионатига чиқиш имконияти 70,3 фоиздан 75,9 га кўтарилди. Терма жамоанинг гуруҳда қолиб кетиш имконияти 1 фоизни ҳам ташкил этмайди. Ўзбекистон жамоасининг гуруҳда 3—4-ўринни олиб, саралашнинг 4-босқичига йўл олиш имкони 23,8 фоизга баҳоланган.

Жамоанинг биринчи ўринда гуруҳни якунлаш имконияти 19 фоизга, 2-ўрин билан Жаҳон чемпионатига йўл олиш имкони эса 57,3 фоизга баҳоланган.

А гуруҳида мундиалга чиқиш учун асосий фаворит сифатида Эрон миллий жамоаси кўрсатилган. Ушбу жамоанинг мундиалга чиқиш имконияти 96 фоизни ташкил этмоқда.

Маълумот учун, Эрон саралашнинг 2-турида сафарда БАА терма жамоасини кичик ҳисобда мағлуб этди. Форс жамоаси биринчи турда ўз уйида Қирғизистон устидан ҳам кичик ҳисобда устун келганди.

Учинчи турда Ўзбекистон ва Эрон термалари тўқнаш келади. Ушбу учрашув 10 октябрь куни Тошкентда бўлиб ўтади.