"Интер" бош мураббийи Симоне Индзаги Лаутаро Мартинеснинг голсиз сериясидан хавотирда эмас.
"Нерадзуррилар" сардори жорий мавсум бошидан буён бирорта ҳам гол ура олмади. Форварднинг сўнгги голи 15 июль куни бўлиб ўтган Колумбияга қарши Америка кубоги финалига тўғри келади.
"Лаутарога голлар етишмаяптими? Йўқ, бу муаммо эмас. У бизнинг сардоримиз, у ҳали ўзининг голларини уради. Лаутаро соғлиғи билан боғлиқ муаммолар билан бир ой кеч сафимизга келди. У ҳар доимгидек оптимал формага кириб, гол уришни бошлайди. Лаути ҳар доим биз учун муаммо эмас, ечим бўлади", - деди Индзаги чоршанба кунги Чемпионлар лигаси доирасида "Манчестер Сити"га қарши ўйин олдидан матбуот анжуманида.
