Осиё Чемпионлар Лигасининг икки карра ғолиби ва Хитойнинг саккиз карра чемпиони "Гуанчжоу" 2025 йилда профессионал футболда иштирок этмайди, деб хабар беради клуб матбуот хизмати.
Таъкидланишича, Хитой футбол ассоциацияси молиявий муаммолар туфайли жамоага бўлажак мавсумда иштирок этиш учун рухсат бермаган.
"Клуб янги мавсумда профессионал лигага кириш учун жуда кўп ҳаракатларни амалга оширди, аммо йиллар давомида орттирилган катта қарз туфайли, профессионал лигада иштирок этиш учун маблағ етарли эмас", дейилади баёнотда.
"Гуанчжоу" 2011 йилдан 2017 йилгача, шунингдек 2019 йилда Хитой чемпионатида ғолиб чиқди. Жамоа 2013 ва 2015 йилларда Осиё Чемпионлар Лигасида ғолиб чиқди.
Йиллар давомида Марчелло Липпи, Луис Фелипе Сколари ва Фабио Каннаваро каби мутахассислар Гуанчжоу клубига мураббийлик қилган.
"Гуанчжоу" сўнгги йилларда Хитой биринчи лигасида ўйнаб келмоқда ва жамоа ўтган мавсумда Суперлигага чиқа олмаган эди.
