Лондоннинг «Челси» ва «Тоттенхэм» жамоаларининг собиқ бош мураббийи Маурисио Почеттино нега АҚШ терма жамоаси бош мураббийи лавозимини қабул қилганини тушунтириб берди.  

«Эҳтимол, одамлар бу қароримни тушунишда қийинчиликка дуч келар. Менимча, биз каби мураббийлар штаби учун узоқ йиллик клуб фаолиятидан сўнг ўзимизга янги чақириқ ташлаш, ўзгача иш тизимида ўзимизни очиб бериш учун ажойиб имконият эди. Шунинг учун биз бу таклифга эътибор қаратдик ва таклиф келганда, "ҳа" дейиш осон бўлди».

«Менимча, жаҳон чемпионатига мезбонлик қилиш – бу ажойиб тажриба. Айниқса, гап АҚШ ҳақида кетаётган бўлса, бу жуда ҳайратланарли. Ҳозир жуда кўп ижобий нарсалар рўй бермоқда, ва, албатта, мен бу ишни қабул қилишимнинг асосий сабабларидан бири жаҳон чемпионатининг жуда яқин қолганидир. Мундиалда иштирок этиш учун тўрт йил кутиш шарт эмас, атиги икки йилдан кам вақт қолди».  

«Мен жуда ҳаяжондаман, чунки қарор тўғри бўлди, мен катта завқ олмоқдаман ва ҳар куни ўзим учун янги нарсаларни кашф қилиш, турли ҳиссиётларни бошдан кечириш жуда қизиқарли. Бу олдинги ишларимдан бутунлай бошқача. Бу бир сири очилмаган дунё каби, лекин биз бу вазиятдан жуда-жуда завқ олмоқдамиз», – деб Почеттинонинг сўзларини келтиради Sky Sports.

Эслатиб ўтамиз, 2026 йилги жаҳон чемпионати АҚШ, Канада ва Мексикада бўлиб ўтади.