Londonning «Chelsi» va «Tottenxem» jamoalarining sobiq bosh murabbiyi Maurisio Pochettino nega AQSH terma jamoasi bosh murabbiyi lavozimini qabul qilganini tushuntirib berdi.  

«Ehtimol, odamlar bu qarorimni tushunishda qiyinchilikka duch kelar. Menimcha, biz kabi murabbiylar shtabi uchun uzoq yillik klub faoliyatidan so‘ng o‘zimizga yangi chaqiriq tashlash, o‘zgacha ish tizimida o‘zimizni ochib berish uchun ajoyib imkoniyat edi. Shuning uchun biz bu taklifga e’tibor qaratdik va taklif kelganda, "ha" deyish oson bo‘ldi».

«Menimcha, jahon chempionatiga mezbonlik qilish – bu ajoyib tajriba. Ayniqsa, gap AQSH haqida ketayotgan bo‘lsa, bu juda hayratlanarli. Hozir juda ko‘p ijobiy narsalar ro‘y bermoqda, va, albatta, men bu ishni qabul qilishimning asosiy sabablaridan biri jahon chempionatining juda yaqin qolganidir. Mundialda ishtirok etish uchun to‘rt yil kutish shart emas, atigi ikki yildan kam vaqt qoldi».  

«Men juda hayajondaman, chunki qaror to‘g‘ri bo‘ldi, men katta zavq olmoqdaman va har kuni o‘zim uchun yangi narsalarni kashf qilish, turli hissiyotlarni boshdan kechirish juda qiziqarli. Bu oldingi ishlarimdan butunlay boshqacha. Bu bir siri ochilmagan dunyo kabi, lekin biz bu vaziyatdan juda-juda zavq olmoqdamiz», – deb Pochettinoning so‘zlarini keltiradi Sky Sports.

Eslatib o‘tamiz, 2026 yilgi jahon chempionati AQSH, Kanada va Meksikada bo‘lib o‘tadi.