"Барселона" яна ўнг қанот ҳимоячиси қидиришни бошлади. “Кўк-анорранглилар” раҳбарияти Жюл Кунде марказий ҳимоячи позициясига қайтиши учун ҳимоянинг ўнг қанотини кучайтириш ниятида. "Барселона" спорт директори Деку аллақачон ўнг қанот ҳимоячиси лавозимига асосий номзодлар рўйхатини тузган.

Каталонияликларнинг асосий мақсади “Монако” ҳимоячиси Вандерсон. Бразилиялик футболчини бир неча ойдан бери кузатиб боришади. Бироқ уни қўлга киритиш осон бўлмайди. Клуб Вандерсонни 30 миллион евродан камига қўйиб юбориш ниятида эмас. "Барселона" қўшимча бонуслар орқали бу миқдорни камайтиришга ҳаракат қилади.

Сўнгги ҳафталарда "блауграна" бошқа вариантга эга бўлди: "Боруссия Дортмунд" ҳимоячиси Ян Коуто. Ёш бразилиялик ўтган ёзда немис клуби билан 25 миллион евро эвазига шартнома имзолаганди, бироқ у ерда етарлича вақт топа олмаяпти.

Декуга тақдим этилган учинчи вариант - "Райо Валекано" ҳимоячиси Андрей Ратиу. Руминиялик футболчи ўзини Ла Лигадаги энг барқарор ҳимоячилардан бири сифатида кўрсатди. Унинг Испания чемпионатини билиши ва арзонлиги уни жозибадор вариантга айлантиради.