"Бавария" ва Англия терма жамоаси ҳужумчиси Харри Кейн ҳали АПЛга қайтиш нияти йўқлигини айтди.

"Узоқроқ қолиш ["Бавария"да] масаласига келсак, мен буни аниқ тушунишим мумкин. Бир-икки ҳафта олдин "Бавария" билан ҳали бундай суҳбатлар бўлмаганини очиқ айтгандим, аммо агар улар бўлса, гаплашишга ва самимий суҳбат ўтказишга тайёрман. Кўриниб турибдики, бу келгуси йил қандай ўтишига ёки тахминан нимага эришишимизга боғлиқ. Айни дамда биз фантастик мавсумни бошдан кечиряпмиз, деб айтган бўлардим ва мен бошқа ҳеч нарсани ўйламаяпман.

Премьер-лигага келсак, билмайман. Агар мендан "Бавария"га ўтган вақтимда сўраганингизда, аниқ қайтаман, деган бўлардим. Фаолиятим давомида ўрганганларим шуки, турли имкониятлар ва турли вақтлар бўлади ва ҳамма нарса ўз ўрнига тушади," - дея 32 ёшли англияликнинг сўзларини келтиради ESPN.

2025/26 йилги мавсумда Кейн барча мусобақаларда 10 та ўйинда 18 та гол урди ва 3 та голли узатмани амалга оширди. Унинг "Бавария" билан шартномаси 2027 йилнинг 30 июнига қадар амал қилади.

Ҳужумчи бунгача "Тоттенҳем," "Лестер," "Норвич," "Millwall" ва "Лейтон Ориэнт" клубларида ўйнаган.