Ўзбекистон футбол ассоциацияси (ЎФА) бир қатор профессионал клубларнинг футболчилар ва бошқа жамоалар олдидаги молиявий мажбуриятларини бажармаётганини маълум қилди. Унга кўра, “Навбаҳор”, “Нефтчи”, “Андижон”, “Хоразм”, “Бухоро”, “Қумқўрғон-1977” ва “ТерДУ” клублари қарзларини белгиланган муддатларда тўлиқ қопламаган.

Ёзилишича, “Навбаҳор” футболчилар Жамшед Искандаров, Иброҳим Йўлдошев, Диёржон Туропов, Одил Ҳамробеков, Аброр Исмоилов, Шаҳзодбек Убайдуллаев ва мураббий Муҳиддин Ортиқов олдидаги қарзларни тўлиқ тўламаган.

“Нефтчи” эса Азизбек Амонов, Манучеҳр Сафаров ва Шоҳруҳ Ғадоев билан бўлган молиявий мажбуриятларини бажармаган.

Бундан ташқари, “Андижон” клуби “Пахтакор” ва “Бунёдкор” олдидаги машғулот компенсацияси ҳамда трансфер шартномалари бўйича, “Хоразм” ва “Бухоро” эса “Пахтакор” олдидаги қарзларини тўламаган.

“Қумқўрғон-1977” футболчи Орзу Раззоқов, “ТерДУ” эса Сарвар Ҳусонов ва Фаррух Ҳайдаров билан ҳисоб-китоб қилмаган.

Аввалроқ, қарзларни ўз вақтида узмаганлик сабабли “Навбаҳор” ва “Нефтчи” клубларига 2025-йилги мавсумда қишки трансфер ойнасида янги футболчиларни рўйхатдан ўтказиш тақиқи қўйилганди. Вилоят ҳокимликлари томонидан қарзларни тўлаш бўйича кафолат хатлари тақдим этилгач, бу тақиқ вақтинча олиб ташланган, бироқ тўловлар тўлиқ амалга оширилмаган.

ЎФА таъкидлаганидек, бу клубларнинг қарзларини узмасдан келаётгани сабабли уларга нисбатан янада қатъий чоралар кўрилиши кутилмоқда.

3 ноябрь куни ЎФАнинг тегишли қўмитасида қуйидаги санксиялар муҳокама қилинади:

- “Навбаҳор лочинлари” ва “Нефтчи” клубларидан Суперлигадаги 3 очко олиб ташлаш ва қишки трансфер ойнасида янги футболчиларни рўйхатдан ўтказишни тақиқлаш;

- “Андижон”, “Хоразм”, “Бухоро” ва “ТерДУ” клубларига янги футболчиларни рўйхатдан ўтказиш бўйича тақиқ қўйиш;

- “Қумқўрғон-1977” клубини эса мусобақадан четлаштириш эҳтимоли мавжуд.

“Ассоциация аъзоси бўлган ҳар бир клуб футболчилар, мураббийлар ва бошқа жамоалар олдидаги молиявий мажбуриятларни ўз вақтида бажариши шарт”, дейилади ЎФА баёнотида.