ОФК Элит Чемпионлар лигаси гуруҳ босқичи 5-тури доирасида Қаршидаги «Марказий» стадионида бўлиб ўтган «Насаф» – «Трактор» учрашуви кескин ва хавфли вазиятларга бой бўлди.

Мезбонлар ўйинни жуда фаол ва хавфли ҳужумлар билан бошлади. Дастлабки дақиқалардаёқ эронликлар дарвозаси олдида ўта хавфли вазият яратилди, бироқ мезбонлар вазиятни голга айлантира олмади.

17-дақиқада эса баҳсдаги ягона гол урилди — Регги Лушкя "Трактор"ни олдинга чиқишди.

Биринчи бўлимнинг қолган қисми қарши ҳужумлар ва имкониятлар билан ўтди. «Трактор» бир неча бор хавфли вазият яратди, аммо Абдувоҳид Неъматов ўз дарвозасини ишончли ҳимоя қилди.

Иккинчи бўлим янада жонли ўтди. «Насаф» мураббийлар штаби 58-дақиқадан бошлаб бир нечта тактик ўзгартишларни амалга оширди: Нуруллоев ва Норчаев ўрнига Чолович ҳамда Абдуназаров майдонга тушди. Бу ўзгаришлар ҳужумни кучайтиришга қаратилган эди ва бунинг самараси узоқ куттирмади — Шароф Муҳитдиновнинг кучли зарбасини рақиб дарвозабони қийналиб бўлса-да қайтарди.

«Насаф» ўйинни тиклаш учун бор куч билан ҳаракат қилди. 74-дақиқада Сиддиқов майдонга пайдо бўлди, 85-дақиқада эса Отабанжо ва Голбан ўйинга қўшилди. Аммо босим ва фаолликка қарамай, ҳисоб ўзгармади.

Учрашувни жонли томоша қилиш учун «Марказий» стадионга 5283 нафар мухлис ташриф буюрди. Уларнинг қўллаб-қувватловига қарамай, «Насаф» муҳим очколарни қўлга кирита олмади. Рўзиқул Бердиев жамоаси Элит ОЧЛда кетма-кет бешинчи мағлубиятни ўз ҳисобига ёзиб қўйди.

Элит ОЧЛ. 5-тур
"НАСАФ" - "ТРАКТОР" (Эрон) - 0:1
Гол: Реги Лушкя (17)