Уругвай футбол ассоциацияси президенти Игнасио Алонсо Марсело Бьелса терма жамоа бош мураббийи бўлиб қолишини тасдиқлади.
"Мураббий биз билан қолади. Бьелса билан учрашув жуда самарали бўлди, биз ЖЧ-2026 га тайёргарлик кўришда ҳамма ўзини қулай ҳис қилиши учун ишни яхшилаш йўналишларини муҳокама қилдик. АҚШ билан ўйин келтириб чиқарган инқирознинг ижобий томони шундаки, у бизни керакли ўзгаришларни тушуниш учун астойдил ишлашга мажбур қилди.
Шуниси муҳимки, бўлиб ўтган барча суҳбатлар ва бир неча кунлик мулоҳазалардан сўнг ҳеч ким кемани тарк этишни ёки истеъфога чиқишни талаб қилишни хоҳламайди. Барчамиз жаҳон чемпионати олдидан жамоани керакли изга қайтаришга эътибор қаратмоқдамиз," - дея Алонсонинг сўзларини келтиради ESPN.
Уругвайликлар 18 ноябрь куни ўртоқлик ўйинида АҚШ жамоасига (1:5) ютқазди.
Аргентиналик 70 ёшли Бьелса 2023 йилнинг май ойидан буён Уругвай терма жамоасида ишлаб келмоқда. Унинг қўл остида жамоа 31 ўйинда 16 ғалаба, 8 дуранг ва 7 мағлубият қайд этган.
