«ПСЖ» Париж меҳнат низолари бўйича судининг клубни жамоанинг собиқ ҳужумчиси Килиан Мбаппега тахминан 61 миллион евро миқдорида компенсация тўлашга мажбурлаш ҳақидаги қарорига муносабат билдирди.

«“Пари Сен-Жермен” Париж меҳнат низолари бўйича суди чиқарган қарорни маълумот сифатида қабул қилади ва уни бажаради, бироқ апелляция бериш ҳуқуқини ўзида сақлаб қолади.

“ПСЖ” ҳар доим ҳалол ва виждонан ҳаракат қилган ва бундан кейин ҳам шундай йўл тутади. Энди клуб жамоавий бирлик ва умумий муваффақиятларга асосланган келажакка қарамоқда ҳамда футболчига кейинги фаолиятида омад тилайди», — дейилади француз гранди матбуот хизмати баёнотида.

Жорий йил ноябрь ойида Мбаппе «ПСЖ»дан 263 миллион евро миқдорида компенсация талаб қилаётгани хабар қилинган эди. Ушбу суммага ҳужумчига шартнома якунланганидан кейин тўланмаган маош ва мукофот пуллари, шунингдек, жамоада унга нисбатан муносабат учун талаб қилинаётган компенсация ҳам киритилган.