Халқаро бокс ассоциацияси (IBA) президенти Умар Кремлёв жаҳон чемпионати финалида юз берган можароли ҳолат — қулоқ тишлаш эпизоди бўйича ташкилотнинг тиббий ва интизомий комиссиялари масалани кўриб чиқишини маълум қилди.

Душанба куни Россия терма жамоаси Дубайда бўлиб ўтган бокс бўйича жаҳон чемпионатидан Москвага қайтиб келди. 60 килограммгача вазн тоифасида россиялик боксчи Всеволод Шумков олтин медални қўлга киритди. Финал жангида у 2024-йилги Олимпия ўйинлари чемпиони, ўзбекистонлик Абдумалик Ҳалоковни мағлуб этди. Жанг давомида Шумков рақибининг қулоғини тишлаб олгани билан боғлиқ ҳолат қайд этилган.

“Ҳалоков ҳамда Шумков ўртасидаги жанг билан боғлиқ вазият IBA назорати остида. Ушбу ҳолатни масъул шахслар, тиббий ва интизомий комиссиялар кўриб чиқади. Барчани турли хил хулосалардан тийилишга, ақл ва профессионаллик билан қарор қабул қилишга чақираман. Комиссиялар барча зарур чораларни кўради ва икки томон билан муҳокамадан сўнг IBA аниқ қарорини эълон қилади.

Аввало спортчиларни, спортимизни ва бир-биримизни ҳурмат қилишни тавсия этаман. Қандай қарор қабул қилинишидан қатъи назар, ҳаммаси ўз ўрнига тушади. Таъкидлайман — қарор холис ва адолатли бўлади”, — дейди Кремлёв ўзининг ижтимоий тармоқдаги саҳифасида.

Маълумот учун, 24 ёшли Всеволод Шумков 2024-йилда Белградда ўтган Европа чемпиони, шунингдек, 2023-йили Тошкентда бўлиб ўтган жаҳон чемпионатининг бронза совриндори ҳисобланади.