Бугун Куала-Лумпур шаҳрида ОФК Президенти кубоги мусобақасига ташланган қуръа натижасига кўра, ғолибликка асосий даъвогар ҳисобланган Марказий Осиёнинг икки жамоаси — "Болқон" (Туркманистон) ва "Дордой" (Қирғизистон) турли гуруҳларга тушишди.

Марказий Осиё жамоалари мусобақа ташкил этилгандан буён ҳамиша ғолибликка даъвогар бўлиб келишган. Шу пайтгача ўтказилган 8та мусобақанинг 6тасида Тожикистон (ҳозир бу мамлакат клублари ОФК кубогига ўтиб кетишди) ва Қирғизистон жамоалари ғолиб чиқишган бўлса, қолган 2та сворин Хитой Тайпейининг "Пауэр Компани" ва Мьянмарнинг "Яданарбон" клубларига насиб этган.

Қуръа натижаларига кўра, "Болқон" мусобақа дебютанти — "Эрчим" (Мўғулистон) ва Непал чемпиони, 2005 йилги мусобақанинг ярим финалчиси — "Три Стар" клуби билан "А" гуруҳидан жой олди.

"Дордой" эса Покистоннинг "КРЛ" ФК ва Фаластиннинг "Ал-Қудс Ҳилол" жамоалари билан "В" гуруҳида баҳсларда иштирок этади. Ўйинлар 23-29 сентябрь кунлари ўтказилади. Гуруҳ ғолиблари тўғридан-тўғри финалда иштирок этишади. ОФК ҳали мусобақага мезбонлик қиладиган жой номига аниқлик киритмади.

ОФК ПРЕЗИДЕНТИ КУБОГИ, Финал босқичи
"А" гуруҳи
"Болқон" (Туркманистон)
"Эрчим" (Мўғулистон)
"Три Стар" (Непал)

"B" гуруҳи
"КРЛ" (Покистон)
"Ал-ҚУдс Ҳилол" (Фаластин)
"Дордой" (Қирғизистон)