Наманганнинг “Навбаҳор” клуби собиқ бош мураббийи Андрей Канчельскис Қозоғистон ва Ўзбекистон футболи ривожини солиштирди. Ҳозирда Россиянинг Брянск шаҳридаги “Динамо” клуби бош мураббийи ҳамда функционери бўлиб фаолият юритаётган мутахассис Қозоғистон футболининг “нормал ривожланишига” нималар халақит бераётгани ҳақида фикр билдирди.

“Қозоғистон билан солиштирганда, Ўзбекистон футболи ривожланишда жуда катта қадам ташлади. Айнан Ўзбекистон биринчи бўлиб Жаҳон чемпионатига йўл олди. Абдуқодир Ҳусанов эса Англия Премьер Лигасида ўйнамоқда. Ҳа, Қозоғистонда ҳам яхши футболчилар бор, бироқ у ерда футболнинг нормал ривожланишига тўсқинлик қилаётган муаммолар жуда кўп. Ўзбекистондаги инфратузилма собиқ совет ҳудудидаги энг яхшиси ҳисобланади. Бу ерга футболни тушунадиган мутахассислар келди, инфратузилма ривожлантирилди, болалар ва ўсмирлар футболига сармоя киритилди. Ўзбекистонда ишлаш менга жуда ёққан. У ерда ҳамма футболни ривожлантиришдан манфаатдор.

Қозоғистонда бошқача. Биз бирор ташаббус билан чиқсак, айримлар инфратузилмани ўзимиз билан олиб кетамиз, деб ўйлайди. “Бунинг нима кераги бор?” деган саволлар берилади. Майдонлар сифати масаласига келсак, у ерда футбол ўйнаш деярли имконсиз. Сунъий майдонлар футболни барбод қилади. Масалан, Қўстанайда иккита майдон бор: бири табиий, бири усти ёпиқ сунъий. Биламанки, мамлакатда стадионлар қуриш режалаштирилган, биттаси аллақачон фойдаланишга топширилган. Аммо кейин-чи? Қоғозда хоҳлаганча нарса қуриш мумкин. Шунга қарамай, терма жамоа ва “Қайрат”нинг натижалари туфайли Қозоғистонда футболга қизиқиш ошганини инкор этиб бўлмайди”, деди мутахассис “АсНеwс.кз” нашрига берган интервьюсида.

Маълумот учун, Андрей Канчельскис Ўзбекистонда “Навбаҳор”, Қозоғистонда эса Қўстанайнинг “Тобол” клубида бош мураббий сифатида фаолият юритган.