Мюнхеннинг «Бавария» клуби ҳужумчи Харри Кейн билан шартномани узайтириш бўйича музокараларни расман бошлади. Бу ҳақда журналист Флориан Плеттенберг X ижтимоий тармоғида хабар берди.

Манбага кўра, томонлар 2028 ёки 2029 йилгача мўлжалланган янги меҳнат шартномасини имзолаш масаласини муҳокама қилмоқда. Мюнхенликларнинг спорт директори Макс Эберль ушбу маълумотни тасдиқлади.

«Биз Харри билан музокаралар олиб бормоқдамиз», — дея Эберлнинг сўзларини келтиради журналист.

Қайд этилишича, футболчининг ўзи ҳам амалдаги жамоасида қолишни истайди. Кейннинг «Бавария» билан амалдаги шартномаси 2027 йилгача амал қилади. Transfermarkt маълумотларига кўра, англиялик футболчининг ҳозирги бозор қиймати € 65 млнни ташкил этади. Харри Кейн 2023 йилда «Бавария»га ўтган. Шу вақт мобайнида у клуб сафида 126 та учрашув ўтказиб, 119 та гол урди ва 30 та голли узатма амалга оширди.