Myunxenning «Bavariya» klubi hujumchi Xarri Keyn bilan shartnomani uzaytirish bo‘yicha muzokaralarni rasman boshladi. Bu haqda jurnalist Florian Plettenberg X ijtimoiy tarmog‘ida xabar berdi.

Manbaga ko‘ra, tomonlar 2028 yoki 2029 yilgacha mo‘ljallangan yangi mehnat shartnomasini imzolash masalasini muhokama qilmoqda. Myunxenliklarning sport direktori Maks Eberl ushbu ma’lumotni tasdiqladi.

«Biz Xarri bilan muzokaralar olib bormoqdamiz», — deya Eberlning so‘zlarini keltiradi jurnalist.

Qayd etilishicha, futbolchining o‘zi ham amaldagi jamoasida qolishni istaydi. Keynning «Bavariya» bilan amaldagi shartnomasi 2027 yilgacha amal qiladi. Transfermarkt ma’lumotlariga ko‘ra, angliyalik futbolchining hozirgi bozor qiymati € 65 mlnni tashkil etadi. Xarri Keyn 2023 yilda «Bavariya»ga o‘tgan. Shu vaqt mobaynida u klub safida 126 ta uchrashuv o‘tkazib, 119 ta gol urdi va 30 ta golli uzatma amalga oshirdi.