«Ал-Иттиҳод» бош мураббийи Сержиу Консейсау ҳужумчи Карим Бенземанинг жамоа сафида ўйнашни истамаётгани ҳақидаги хабарларга изоҳ берди.

Аввалроқ 38 ёшли форвард Саудия клубининг ҳамкорлик бўйича янги таклифидан хафа бўлгани ҳақида маълумотлар тарқалган эди. Шунингдек, франциялик футболчи шахсан ўзи Про-лиганинг «Ал-Фотиҳ»га қарши учрашуви (2:2) учун таркибдан чиқарилишини сўрагани таъкидланган.

«Карим Бензема масаласида клуб раҳбариятидан сўрашингиз керак. Менинг вазифам жамоани машқ қилдириш, ўйинга тайёрлаш, натижа қайд этиш ва совринлар ютишдан иборат. Қолгани менинг вазифаларим доирасига кирмайди. Фақат битта нарсани айта оламан: Карим — ажойиб профессионал, фантастик футболчи ва мен мураббий сифатида у билан фахрланаман», — дея Консейсаунинг сўзларини журналист Фабрицио Романо X ижтимоий тармоғида келтиради.