Ҳужумчи Карим Бензема пайшанба оқшомида янги жамоаси — «Ал-Ҳилол» сафида дебют қилди. Франциялик футболчи Саудия Арабистони чемпионати доирасидаги «Ал-Оҳдуд»га қарши баҳсда асосий таркибда майдонга тушди ва биринчи бўлимнинг ўзидаёқ гол уришга муваффақ бўлди. Бензема 31-дақиқада рақиб дарвозасини ишғол қилди.
Февраль ойи бошида 38 ёшли Карим Бензема «Ал-Иттиҳод»дан «Ал-Ҳилол»га кўчиб ўтган эди. Хабарларга кўра, Бензема Жидда клубининг шартномани узайтириш бўйича берган таклифини эшитгач, ўзини «ҳақоратлангандек» ҳис қилган ва жамоадан кетишга қарор қилган.
Эслатиб ўтамиз, Карим Бензема «Олтин тўп» соҳиби ҳисобланади. Франциялик юлдуз ушбу нуфузли мукофотни 2022 йилда қўлга киритган эди.
