«Ан-Наср» Саудия Про-лигасининг навбатдаги турида «Ал-Нажма» жамоасини 5:0 ҳисобида мағлуб этиб, турнир жадвалида пешқадамликни қўлга олди. Криштиану Роналду учрашувнинг 7-дақиқасидаёқ пенальтини аниқ амалга ошириб, ҳисобни очди.

Ўйин якунланганидан кўп ўтмай, 41 ёшли Роналду ижтимоий тармоқлардаги саҳифасига янги пост жойлади. Португалиялик юлдуз ўйиндан олинган суратлар тўпламини икки оғиз сўз билан изоҳлади.

«Шу руҳда давом этамиз!» — деб ёзиб қолдирди Роналду.

Эндиликда Криштиану Роналдунинг фаолияти давомида урган голлари сони 965 тага етди. 1000 та голлик марра тобора яқинлашмоқда.

Эслатиб ўтамиз, ўтган йили Роналду «Ан-Наср» билан шартномасини узайтирган эди — амалдаги келишув 2027 йилнинг ўрталарига қадар мўлжалланган.