Лионель Месси МЛС доирасидаги баҳсда "Интер Майами" жамоасига "Орландо Сити" устидан иродали ғалаба (4:2) қозонишда ёрдам берди.
"Чайкалар" биринчи бўлимдан сўнг 0:2 ҳисобида мағлуб бўлаётган эди. Вазиятлардан бирида "Орландо Сити" мураббийи аргентиналик юлдузга қарата нимадир деди ва бу Леонинг норозилигига сабаб бўлди. Иккинчи бўлимда меҳмонлар ўйин тақдирини ўзгартириб юборишди — Месси дубль қайд этди. The Touchline нашрининг хабар беришича, 90-дақиқада жарима зарбасидан урилган иккинчи голидан сўнг, 38 ёшли футболчи "Орландо" захира ўриндиғига қаради ва бармоқлари билан ишора қилиб, рақиб устозидан гўёки дастхат олишни хоҳлайсизми, деб сўрагандек бўлди.
Лионель Месси учун "Орландо Сити" дарвозасига киритилган голлар жорий МЛС мавсумидаги дастлабкилари бўлди. Эслатиб ўтамиз, биринчи турда Хавьер Маскерано жамоаси "Лос-Анджелес"га йирик (0:3) ҳисобда имкониятни бой берган эди.
