Испания миллий футбол терма жамоаси бош мураббийи Луис де ла Фуэнте 2026 йилги Финалиссима ўйини ўтказиладиган жойни Қатардан кўчириш керак, деб ҳисобламоқда. У бунга Яқин Шарқдаги ҳозирги вазиятни сабаб сифатида келтирган.

«Биз музокаралар олиб борилаётганини англаб турибмиз. Жамият учун энг муҳим вазифа — можарони тўхтатиш. Аммо агар биз бу жараёнга тортилиб қолсак ва у қанча давом этишини билмасак, шу давр мобайнида [Қатарда] ўйнай олмаймиз. Агар имкони бўлса, учрашув ўтказиладиган жойни кўчириш энг мақбул қарор бўлар эди», — деди де ла Фуэнте. Унинг сўзларини Mundo Deportivo нашри Radio Nacional’га таяниб келтирмоқда.

Аввалроқ Qatar Football Association матбуот хизмати мамлакатдаги барча футбол мусобақалари ўйинлари номаълум муддатга қолдирилганини эълон қилган эди.