«Барселона» бош мураббийи Ханс-Дитер Флик Ла Лиганинг бўлажак «Райо Вальекано»га қарши ўйинида ҳужумчи Ферран Торресни асосий таркибда туширишни режалаштирмоқда.
26 ёшли футболчи чемпионатнинг «Севилья»га қарши ўтган баҳсини захира ўриндиғида ўтказган эди, Чемпионлар лигаси 1/8 финали доирасидаги «Ньюкасл» билан учрашувларда эса захирадан майдонга тушди. Mundo Deportivo нашрининг маълумотларига кўра, ҳужумчи якшанба кунги ўйинда асосий таркибда майдонга тушади — у дам бериладиган Роберт Левандовскининг ўрнини эгаллайди.
«Барселона» ва «Райо Вальекано» ўртасидаги тўқнашув Тошкент вақти билан соат 18:00 да бошланади. Ферран Торрес январь ойи охиридан бери гол ура олмаяпти — испаниялик футболчининг голсиз серияси барча турнирларда ўнта ўйинга етди.
