Каталониянинг “Барселона” клуби юлдузи Ламин Ямал 2026-йилги “Олтин тўп” соврини учун курашда яққол фаворитга айланди. Бу ҳақда X(собиқ Twitter)даги The Touchline нашри хабар берган.

Қайд этилишича, иккинчи поғонадан “Бавария” ҳужумчиси Ҳарри Кейн жой олган бўлса, кучли учликни “Реал” форварди Килиан Мбаппе якунлаб берган. 23 март ҳолатига кўра, энг нуфузли индивидуал соврин учун асосий даъвогарлар рейтинги қуйидагича кўриниш олган:

1. Ламин Ямал (“Барселона”);
2. Ҳарри Кейн (“Бавария”);
3. Килиан Мбаппе (“Реал” Мадрид);
4. Педри (“Барселона”);
5. Эрлинг Ҳоланд (“Манчестер Сити”).

Ламин Ямал жорий мавсумда ажойиб натижалар қайд этмоқда. У “Барселона” сафида барча турнирлар доирасида жами 40 та ўйинда майдонга тушиб, ўз ҳисобига 21 та гол ва 16 та голли узатма ёздириб қўйган. Ҳозирда “кўк-анорранглилар” 73 очко билан Ла Лигада пешқадамлик қилмоқда. Шунингдек, жамоа Чемпионлар Лигасининг чорак финалига йўлланма олган ва унда Мадриднинг “Атлетико” клуби билан куч синашади. Ямалнинг ушбу мусобақалардаги муваффақияти унинг “Олтин тўп”ни қўлга киритиш имкониятларини янада ошириши кутилмоқда.

Маълумот учун, амалдаги “Олтин тўп” соҳиби Усмон Дембеле ҳисобланади. “ПСЖ” вингери ўтган мавсум парижликлар сафида Франция чемпионати ва Европа Чемпионлар Лигасида ғалаба қозонди. Шунингдек, у 2025 йил якунида FIFA Қитъалараро Кубоги, 2026 йил ҳисобидан эса Франция Суперкубогини қўлга киритди.