Мадриднинг “Реал” клуби вингери Винисиус Жуниор Испания чемпионати тарихидаги энг сермаҳсул бразилиялик футболчилар рўйхатида юқорилашда давом этмоқда. У Испания Ла Лиганинг 29-туридан ўрин олган “Атлетико”га қарши Мадрид дербисида дубль қайд этиб, жамоасининг 3:2 ҳисобидаги ғалабасига ҳисса қўшди.

Ушбу голлар эвазига Винисиуснинг Испания биринчилигидаги голлари сони 72 тага етди. Бу натижа унга “Барселона” афсонаси Роналдиньони ортда қолдириш имконини берди. Шу ўринда таъкидлаш жоизки, Испания чемпионати тарихидаги энг сермаҳсул бразилиялик футболчи номи ҳамон Роналдога тегишли. У “Барселона” ва “Реал” сафида жами 164 та учрашувда майдонга тушиб, 117 та гол уришга муваффақ бўлган.

Ла Лига тарихидаги энг яхши бразилиялик тўпурарлар топ-10 талиги:

1. Роналдо — 117 та гол
2. Валдо Мачадо — 115 та гол
3. Ривалдо — 107 та гол
4. Бебето — 86 та гол
5. Эваристо де Мачедо — 82 та гол
6. Виллиан Жозе — 82 та гол
7. Луис Фабиано — 72 та гол
8. Винисиус Жуниор — 72 та гол
9. Роналдиньо — 70 та гол
10. Неймар — 68 та гол