Европа истеъмолчилар ташкилоти (Euroconsumers) ва Футбол мухлислари бирлашмаси (Football Supporters Europe) Европа комиссиясига биргаликда шикоят йўллаб, ФИФАни ЖЧ-2026 чипталари сотувида монопол мавқеини суиистеъмол қилишда айблади.
Ташкилотларнинг фикрича, Халқаро футбол федерацияси мухлислар учун асоссиз равишда юқори нархлар ва адолатсиз шартларни белгиламоқда. Politico нашри келтирган шикоят матнида таъкидланишича, бу Европа Иттифоқи фаолияти тўғрисидаги шартноманинг 102-моддасини (бозорда устунлик мавқеини суиистеъмол қилишни тақиқловчи банд) бузиш ҳисобланади.
Ташкилотлар бир қатор эҳтимолий қоидабузарликларни кўрсатиб ўтишган. Улар қаторига жойларни тақсимлашдаги шаффофликнинг йўқлиги, динамик нарх белгилаш тизими ва арзон чипталар тақчиллиги киради. Шунингдек, ФИФА «сохта шошилинчлик» яратиш орқали мухлисларни чипта сотиб олишга мажбур қилувчи «яширин маркетинг стратегиялари»дан фойдаланишда ҳам айбланмоқда.
