Дарвозабон Жоан Гарсиянинг «Эспаньол»дан «Барселона»га ўтганидан бир неча ой ўтиб, бу трансфер унинг янги жамоаси учун жуда фойдали бўлганини ишонч билан айтиш мумкин. Opta статистика компанияси 24 ёшли испаниялик посбоннинг ўйини билан боғлиқ рақамларни эълон қилди.
Ушбу маълумотларга кўра, Гарсия чемпионатда камида 10 та ўйинда иштирок этган барча дарвозабонлар орасида дарвоза соҳасига йўлланган зарбаларни қайтариш бўйича етакчилик қилмоқда. Гарсиянинг кўрсаткичи 79 фоизни ташкил этди. Таққослаш учун, «Реал Сосьедад» вакили Алекс Ремиро 62 фоизлик натижа билан энг ёмон кўрсаткични қайд этди.
Жорий мавсумда Жоан Гарсия клуб миқёсида 36 та учрашувда майдонга тушиб, 35 та гол ўтказиб юборди ва 15 та ўйинда ўз дарвозаси дахлсизлигини сақлаб қолди.
