Франциянинг «Лион» клуби Бразилиянинг «Ботафого» жамоасида тўп сураётган футболчи Жеффиньонинг трансфери учун ўз пулларини талаб қилмоқда. L’Equipe нашрининг хабар беришича, француз клуби раҳбарияти аллақачон ФИФАга тегишли шикоят аризасини топширган.

Футболчи 2023 йилда «Лион» томонидан 10 миллион еврога сотиб олинган эди, кейинчалик у яна «Ботафого»га 5,3 миллион евро эвазига сотилган. Бироқ Бразилия томони белгиланган маблағни ҳанузгача ўтказиб бермаган. Бунинг сабаби эса клубларнинг собиқ эгаси Жон Текстор билан боғлиқ.

Текстор бир вақтнинг ўзида бир нечта клубларни — «Лион», «Ботафого» ва «Моленбек»ни бошқарган. Унинг режасига кўра, клублар учун «умумий касса» тизими яратилиши ва унда маблағлар вазиятга қараб бир жамоадан иккинчисига эркин ўтказилиши керак эди.

Якунда «Лион» устидан назорат бошқа компания ихтиёрига ўтди ва клубнинг янги раҳбарияти мавжуд молиявий муаммоларни, жумладан, амалга оширилмаган трансфер тўловларини ўрганишни бошлади.