«Барселона» сафарда «Атлетико»ни 2:1 ҳисобида мағлуб этди ва Ла Лигада иккинчи ўриндаги «Реал» билан орадаги фарқни етти очкога етказди. Шунга қарамай, финал ҳуштагидан сўнг каталонияликлар вингери Ламин Ямалнинг кайфияти йўқ эди. Тарқалган видеода ғазабланган Ямал дарвозабонлар мураббийи Хосе Рамон де ла Фуэнте ҳамроҳлигида трибуна ости йўлагига кириб кетаётгани акс этган. Йўл-йўлакай Ламин бош мураббий Ханс-Дитер Флик билан гап алмашган.
Mundo Deportivo нашрининг кийиниш хонасидаги манбаларига таяниб хабар беришича, Ямал Хосе Рамон де ла Фуэнте томонидан берилган ҳаддан ташқари кўп кўрсатма ва танбеҳлардан ғазабланган бўлиши мумкин. Ушбу мутахассис дарвозабонлар билан ишлашдан ташқари, стандарт вазиятларни ишлаб чиқишда ҳам иштирок этади.
