"Барселона" ҳужумчиси Рафинья Диас Бразилиядан клуб ихтиёрига қайтди. Бу ҳақда Mundo Deportivo нашри хабар бермоқда.
Манба берган маълумотларга кўра, терма жамоа сафида жароҳат олган футболчи тикланиш жараёнини "Барселона"да давом эттиради. Қайд этилишича, Рафиньянинг асосий мақсади — 10 май куни Мадриднинг "Реал" клубига қарши бўлиб ўтадиган баҳсгача сафга қайтиш.
Жорий мавсумда 29 ёшли Рафинья барча мусобақаларда 31 та ўйинда майдонга тушиб, 19 та гол урди ва саккизта голли узатма муаллифига айланди.
"Барселона" ўзининг навбатдаги ўйинини 8 апрель куни Мадриднинг "Атлетико" клубига қарши ўтказади. Чемпионлар Лигаси чорак финалидан ўрин олган дастлабки учрашув Тошкент вақти билан соат 00:00 да бошланиши режалаштирилган.













