Икки вазн тоифасида UFC чемпиони, грузиялик Илия Топурия спорт нуқтаи назаридан ўз фаолиятини муваффақиятли деб ҳисоблашини тан олди.

"Агар спорт ҳақида гапирадиган бўлсак, мен барча истакларимни амалга оширганимни ҳис қиляпман: жаҳон чемпиони бўлдим, титулни ҳимоя қилдим, шундан сўнг бошқа вазн тоифасига кўтарилиб, яна бир камарни қўлга киритдим. Энди эса Оқ уйда бўламан", — дея Топуриянинг сўзларини келтиради "Marca" нашри.

Илия Топурия 29 ёшда. Грузиялик жангчи 2020 йилдан бери UFC'да иштирок этиб келмоқда. 2024 йилда ярим енгил вазнда (65 кг гача) чемпион бўлди ва шундан сўнг бир марта ўз унвонини ҳимоя қилди. 2025 йилда эса енгил вазн тоифасида (70 кг гача) чемпионлик камарини қўлга киритди.