"Ливерпуль" Чемпионлар лигаси чорак финалининг илк баҳсида "Пари Сен-Жермен"га ҳеч қандай қаршилик кўрсата олмади (0:2).
Мерсисайдликлар дарвоза томон атиги учта зарба йўллашди, аммо уларнинг бирортаси аниқ чиқмади. Парижликлар эса 18 та уриниш (олтитаси аниқ) билан жавоб қайтаришди.
Opta нашрининг хабар беришича, ушбу учрашувда "Ливерпуль"нинг кутилаётган голлари (xG) кўрсаткичи бор-йўғи 0,17 ни ташкил этган — бу Арне Слотнинг клубдаги бутун фаолияти давомидаги энг ёмон натижадир. Эътиборли жиҳати, бундан аввалги антирекорд ҳам "Парк де Пренс"да ўрнатилган эди: ўтган йили "қизиллар" Франция пойтахтида 0,27 xG ҳажмида вазиятлар яратишган, аммо ўшанда мўъжиза туфайли 1:0 ҳисобида ғалаба қозонишган эди.
Арне Слот 2024 йилнинг ёзидан буён "Ливерпуль"ни бошқариб келмоқда.
