Гананинг «Берекум Челси» клубининг 20 ёшли футболчиси Доминик Фримпонг жамоа автобусига қилинган қуролли ҳужум оқибатида ҳалок бўлди.

Ушбу ҳодиса якшанба куни, жамоа Гана чемпионатининг 29-тури доирасида «Самартекс»га қарши кечган сафар ўйинидан (0:1) қайтаётган вақтда содир бўлган.

«Самребойдан Берекумга қайтаётганимизда, жамоамиз автобусига йўлни тўсиб қўйган бир гуруҳ қуролли қароқчилар ҳужум қилишди. Юзига ниқоб таққан, тўппонча ва штурм милтиқлари билан қуролланган шахслар, ҳайдовчимиз автобусни орқага қайтаришга уринган вақтда ўт оча бошлашди. Футболчилар ва ходимлар жон сақлаш учун яқин атрофдаги бутазорлар ичига қочишди», — дея хабар берди клуб матбуот хизмати.