«Барселона» собиқ мураббийи Рональд Куман клуб президенти Жоан Лапортанинг «Атлетико»га қарши ўйинлардаги ҳакамлик борасидаги фикрларига муносабат билдирди.

Каталония жамоаси Чемпионлар лигаси чорак финалида икки ўйин натижасига кўра (0:2, 2:1) мағлуб бўлиб, мусобақани тарк этди.

Жавоб ўйинидан сўнг Лапорта шундай деган эди: «Кеча бизга нисбатан қилинган ишларни қабул қилиб бўлмайди. Бу чидаб бўлмас ҳолат, бу — шармандалик».

«Менимча, ҳакамлик ҳақида гапирганда «шармандалик» сўзини ишлатиш бироз муболаға. Лапорта клуб ичида туриб шундай ўйлашини тушунаман. Лекин ташқаридан қараганда, менга бундай туюлмаяпти», – деди айни дамда Нидерландия терма жамоасини бошқараётган Куман.