«Barselona» sobiq murabbiyi Ronald Kuman klub prezidenti Joan Laportaning «Atletiko»ga qarshi o‘yinlardagi hakamlik borasidagi fikrlariga munosabat bildirdi.

Kataloniya jamoasi Chempionlar ligasi chorak finalida ikki o‘yin natijasiga ko‘ra (0:2, 2:1) mag‘lub bo‘lib, musobaqani tark etdi.

Javob o‘yinidan so‘ng Laporta shunday degan edi: «Kecha bizga nisbatan qilingan ishlarni qabul qilib bo‘lmaydi. Bu chidab bo‘lmas holat, bu — sharmandalik».

«Menimcha, hakamlik haqida gapirganda «sharmandalik» so‘zini ishlatish biroz mubolag‘a. Laporta klub ichida turib shunday o‘ylashini tushunaman. Lekin tashqaridan qaraganda, menga bunday tuyulmayapti», – dedi ayni damda Niderlandiya terma jamoasini boshqarayotgan Kuman.