«Bavariya» hujumchisi Xarri Keyn «Oltin to‘p» uchun kurash va Lamin Yamalning so‘zlari haqida fikr bildirdi.

Myunxen klubi safida Bundesligada 100 ta gol urgan angliyalik futbolchi nufuzli individual mukofotni qo‘lga kiritish imkoniyatlari haqidagi savolga javob berdi.

Avvalroq «Barselona» vingeri Lamin Yamal «Oltin to‘p» eng ko‘p gol urgan futbolchiga emas, balki dunyoning eng yaxshi o‘yinchisiga berilishi kerakligini aytgan edi. Shuningdek, 19 yoshli futbolchi o‘zi va Kilian Mbappeni dunyoning eng yaxshi o‘yinchilari deb hisoblashini ta’kidlagandi.

«Men o‘zim haqimda ko‘p gapirishni yoqtirmayman. Butun e’tiborimni maydondagi ishimga qaratganman. Bu masala bo‘yicha har kimning o‘z fikri bor va bu mutlaqo normal holat.

Yamal nima demoqchi bo‘lganini bilmayman. Lamin — ajoyib futbolchi. U juda kuchli mavsum o‘tkazdi. Xuddi boshqa ko‘plab futbolchilar kabi. Mbappe, Olise, Rodri — da’vogarlar juda ko‘p», — dedi Keyn.