O‘zbekistonlik sport afsonasi, 51 yoshli Oksana Chusovitina Yaponiyaning Aichi-Nagoya shahrida o‘tayotgan 2026-yilgi Osiyo o‘yinlarida tayanib sakrash dasturi bo‘yicha finalga yo‘llanma oldi.

Musobaqaning saralash bosqichida muvaffaqiyatli qatnashgan Chusovitina 13.266 ball to‘plagan holda 4-o‘rinni egalladi va final masalasini ijobiy hal qildi. Oksana Chusovitina ishtirokidagi tayanib sakrash bo‘yicha final bahslari 24-25 sentyabr kunlari bo‘lib o‘tishi rejalashtirilgan​.

O‘zining yettinchi Osiyo o‘yinlarida ishtirok etayotgan Oksana sog‘lig‘i imkon bersa, sportdan ketish niyatida emasligini bildirdi. 22 sentyabr kuni jurnalistlar bilan suhbatda sportchi 2028-yilda Los-Anjelesda bo‘lib o‘tadigan Olimpiada o‘yinlarida qatnashish maqsadi borligini ma’lum qilgan.

“Men 2028-yilgi Olimpiadaga yo‘llanma olishga harakat qilaman. Bu — sport, bu — gimnastika. Agar imkoni bo‘lsa, Los-Anjelesda bo‘ladigan Yozgi olimpiadada ham qatnashishga urinib ko‘raman. Xullas, ha, yo‘llanmani qo‘lga kiritishga harakat qilaman”, deydi Chusovitina.

Ma’lumot uchun, agar Oksana Chusovitina ushbu maqsadiga erishsa, 2028 yil Los-Anjeles bo‘ladigan musobaqa o‘zbekistonlik gimnastikachi uchun faoliyatidagi to‘qqizinchi Olimpiada bo‘ladi.