Италия Кубоги ярим финал жавоб учрашувида «Интер» ўз майдонида «Комо»ни қабул қилди. Қизиқарли ва кескин курашларга бой ўйинда миланликлар 3:2 ҳисобида иродали ғалабага эришди.

Учрашувнинг 32-дақиқасида хорватиялик футболчи Мартин Батурина меҳмонларни ҳисобда олдинга олиб чиқди. 48-дақиқада ярим ҳимоячи Лукаш Да Кунья «Комо» устунлигини икки баробарга оширди.

69-дақиқада «Интер» таянч ярим ҳимоячиси Ҳакан Чалханоглу ҳисобни қисқартирди. 86-дақиқада Чалханоглу дубль расмийлаштириб, мувозанатни тиклади. 89-дақиқада эса ярим ҳимоячи Петар Сучич «Интер»га ғалаба келтирган голни урди.

Жамоалар ўртасидаги илк ўйин 3 март куни бўлиб ўтган ва 0:0 ҳисобида якунланган эди. Шу тариқа, «Интер» икки ўйин натижасига кўра Италия Кубоги финалига йўл олди. Иккинчи финалчи 22 апрель куни бўлиб ўтадиган «Аталанта» — «Лацио» жуфтлигида аниқланади (биринчи ўйин — 2:2).

Италия кубоги. Ярим финал, жавоб учрашуви
21 апрель 2026 йил. Милан
«Интер» — «Комо» 3:2
Голлар: Батурина 32 (0:1), Да Кунья 48 (0:2), Чалханоглу 69 (1:2), Чалханоглу 86 (2:2), Сучич 89 (3:2)