CIES Football Observatory тадқиқот маркази сўнгги беш йил ичида 21 ёшгача бўлган футболчиларга энг кўп ўйин вақти берган клублар рейтингини эълон қилди. Ундаги янгиланган маълумотларга кўра, Ўзбекистон Суперлигасининг бир йўла 11 та клуби ёш иқтидорларга ишонч билдириш бўйича юқори кўрсаткич қайд этган.

Рейтингда ёш футболчиларга берилган дақиқалар фоизи бўйича қуйидаги клублар пешқадамлик қилмоқда:

“Бунёдкор” — 13,9 фоиз
“Сўғдиёна” — 11,5 фоиз
“Андижон” — 9,6 фоиз
“Сурхон” — 9,5 фоиз
“Пахтакор” — 9,3 фоиз
“Насаф” — 8,8 фоиз

Шунингдек, рўйхатдан “Қўқон-1912” (3,0 фоиз), “ОКМК” (2,5 фоиз), “Қизилқум” (1,6 фоиз), “Навбаҳор” (0,8 фоиз) ва “Нефтчи” (0,5 фоиз) клублари ҳам ўрин олган.

Бу маълумотлар шуни кўрсатадики, “Бунёдкор” ва “Сўғдиёна” каби жамоалар таркибни ёшартириш ва ўз академияси тарбияланувчиларига асосий таркибдан жой бериш борасида Ўзбекистонда энг яхши тизимга эга бўлиб турибди.

Рейтингда Даниянинг “Нордшелланд” клуби мутлоқ етакчига айланди — жамоа ўйин вақтининг 44,7 фоизини ёш футболчиларга ишониб топширган. Кучли учликдан Словакиянинг “Жилина” (35,3 фоиз) ва Австриянинг “РБ Зальцбург” (35,0 фоиз) жамоалари жой олди.

Европанинг кучли бешлик чемпионатлари орасида эса “Барселона” (20,7 фоиз) ёшларга энг кўп имконият берган клуб сифатида қайд этилди. Кейинги ўринларни “Страсбург” (18,6 фоиз) ва “Сандерленд” (18,5 фоиз) эгаллади.