CIES Football Observatory tadqiqot markazi so‘nggi besh yil ichida 21 yoshgacha bo‘lgan futbolchilarga eng ko‘p o‘yin vaqti bergan klublar reytingini e’lon qildi. Undagi yangilangan ma’lumotlarga ko‘ra, O‘zbekiston Superligasining bir yo‘la 11 ta klubi yosh iqtidorlarga ishonch bildirish bo‘yicha yuqori ko‘rsatkich qayd etgan.

Reytingda yosh futbolchilarga berilgan daqiqalar foizi bo‘yicha quyidagi klublar peshqadamlik qilmoqda:

“Bunyodkor” — 13,9 foiz
“So‘g‘diyona” — 11,5 foiz
“Andijon” — 9,6 foiz
“Surxon” — 9,5 foiz
“Paxtakor” — 9,3 foiz
“Nasaf” — 8,8 foiz

Shuningdek, ro‘yxatdan “Qo‘qon-1912” (3,0 foiz), “OKMK” (2,5 foiz), “Qizilqum” (1,6 foiz), “Navbahor” (0,8 foiz) va “Neftchi” (0,5 foiz) klublari ham o‘rin olgan.

Bu ma’lumotlar shuni ko‘rsatadiki, “Bunyodkor” va “So‘g‘diyona” kabi jamoalar tarkibni yoshartirish va o‘z akademiyasi tarbiyalanuvchilariga asosiy tarkibdan joy berish borasida O‘zbekistonda eng yaxshi tizimga ega bo‘lib turibdi.

Reytingda Daniyaning “Nordshelland” klubi mutloq yetakchiga aylandi — jamoa o‘yin vaqtining 44,7 foizini yosh futbolchilarga ishonib topshirgan. Kuchli uchlikdan Slovakiyaning “Jilina” (35,3 foiz) va Avstriyaning “RB Zalsburg” (35,0 foiz) jamoalari joy oldi.

Yevropaning kuchli beshlik chempionatlari orasida esa “Barselona” (20,7 foiz) yoshlarga eng ko‘p imkoniyat bergan klub sifatida qayd etildi. Keyingi o‘rinlarni “Strasburg” (18,6 foiz) va “Sanderlend” (18,5 foiz) egalladi.