Нигерия терма жамоасининг собиқ аъзоси Майкл Энерамо 40 ёшида вафот этди. Бу ҳақда Нигерия футбол федерацияси (NFF) матбуот хизмати расмий баёнот берди.

Маълум қилинишича, кўнгилсиз ҳодиса жума куни эрталаб Кадуна шаҳрида ўтказилган ўртоқлик учрашуви пайтида юз берган. Футболчи ўйиннинг иккинчи бўлими бешинчи дақиқасида тўсатдан ҳушини йўқотган. Дастлабки тиббий хулосаларга кўра, ўлимга юрак хуружи сабаб бўлган.

«Бу жуда қайғули хабар. Ҳозирги вақтда сўз топиш қийин. Унинг яқинларига ва Нигерия футбол жамоатчилигига ҳамдардлик билдирамиз», — деди федерация бош котиби Муҳаммад Сануси.

Майкл Энерамо фаолиятининг катта қисмини Туркия ва Тунис клубларида ўтказган. Хусусан, у Туркиянинг «Сивасспор», «Бешиктош» ва «Башакшеҳир» каби жамоаларида тўп сурган. Туниснинг «Эсперанс» клубидаги сермаҳсул ўйинлари учун мухлислар томонидан «Танк» лақабини олган эди.

Ҳужумчи Нигерия терма жамоаси сафида жами 10 та ўйинда майдонга тушиб, ўз ҳисобига голлар ёздириб қўйган. Энерамо 2009 йилда «Супер бургутлар» сафида дебют қилган эди.