Клублар ўртасидаги Осиё чемпионатида иштирок этаётган "Ардус" иккинчи турда Қатарнинг "Ас-Садд" клубига ютқазиб қўйди. Ваҳоланки, биринчи бўлимдан сўнг Баҳодир Аҳмедов шогирдлари 2:0 ҳисобида олдинда боришаётганди. Голларга Фарҳод Абдумавлонов ва Артур Юнусов муаллифлик қилишди.

Иккинчи бўлимнинг дастлабки 5 дақиқасида эса қатарлик футзалчилар Рустам Умаров қўриқлаётган дарвозани кетма-кет 3 марта ишғол қилишди ва ҳисобда олдинга ўтиб олишди. Ҳисобни тенглаштириш учун қилинаётган ҳаракатлар бесамар кетаётганини кўрган Баҳодир Аҳмедов, ўйин тугашига 4 дақиқа қолганида майдонга дарвозабон ўрнига бешинчи ўйинчини туширди. Бироқ бу тактика "Ас-Садд"нинг фойдасига ишлади. Улар аввалига тўртинчи голни ҳам уришди. Бу орада Андрей Шлёманинг зарбаси эвазига "Ардус" ҳисобни 3:4га қисқартирди. Ўйин тугашига 2 дақиқа қолганидан қатарлик дарвозабон тўпни жамоадошига етказиб берди ва ҳужумчи бўш қолган дарвозага бешинчи голни киритди.

Ушбу баҳсда жамоанинг етакчи ўйинчиси Дилшод Ирсалиев "Ардус"га ёрдам бера олмади. У кеча "Чонбури" билан ўйинда иккита сариқ карточка олиб, майдондан четлатилганди.

"Ардус" гуруҳда сўнгги баҳсни эртага "Санойи Гити Пасанд"га қарши ўтказади. Мусобақанинг амалдаги чемпионига қарши ўйин Тошкент вақти билан соат 12:30да бошланади.

Футзал бўйича клублар ўртасида Осиё чемпионати. Япония, Нагоя
"АС-САДД" (Қатар) - "АРДУС" (Ўзбекистон) - 5:3
Голлар: Фарҳод Абдумавлонов, Артур Юнусов, Андрей Шлёма
"Ардус" (бошланғич таркиб): Рустам Умаров, Шуҳрат Тожибоев, Андрей Шлёма (С), Жамолиддин Шарипов, Артур Юнусов
Захира: Зариф Бегулов, Жавлон Аноров, Аъзам Сайдаҳмедов, Дилшод Раҳматов, Фарҳод Абдумавлонов, Николай Кравченко, Шаҳзод Бўриев, Константин Свиридов