Франция чемпионатининг 31-туридан ўрин олган баҳсда «ПСЖ» сафарда «Анже» меҳмони бўлди. Франциянинг Анже шаҳридаги «Раймон Копа» стадионида ўтган учрашувда парижликлар 3:0 ҳисобида ғалаба қозонди.

Учрашувдаги ҳисобни 7-дақиқада «ПСЖ» ярим ҳимоячиси Ли Кан Ин очди. 39-дақиқада Сенни Маюлу меҳмонлар устунлигини оширди. 52-дақиқада ҳимоячи Лукас Бералдо «Анже» дарвозасига учинчи голни киритди. 74-дақиқада эса парижликлар ҳужумчиси Гонсалу Рамуш иккинчи сариқ карточкаси учун майдондан четлатилди.

Франция чемпионатида 30 та ўйиндан кейин «ПСЖ» 69 очко билан турнир жадвали пешқадами бўлиб турибди. «Анже» эса 31 учрашувдан сўнг 34 очко билан 13-ўринда жойлашган.

Кейинги турда «Анже» 3 май куни сафарда «Осер»га қарши ўйнайди, «ПСЖ» эса бир кун олдин ўз майдонида «Лорьян»ни қабул қилади.

Франция — Лига 1, 31-тур
25 апрель 2026 йил, шанба
«Анже» — «ПСЖ» 0:3
Голлар: Ли Кан Ин 7 (0:1), Маюлу 39 (0:2), Бералдо 52 (0:3).
Четлатиш: Гонсалу Рамуш 74 («ПСЖ»).