Лондоннинг «Арсенал» клуби вингери Букайо Сака жароҳатидан сўнг майдонга қайтди. 24 ёшли футболчи Премьер-лига доирасида шанба куни «Ньюкасл»га қарши бўлиб ўтган ўйиннинг 81-дақиқасида захирадан майдонга тушди. Учрашув «канонирлар»нинг минимал ҳисобдаги ғалабаси билан якунланди, ягона голга эса 9-дақиқадаёқ Эберечи Эзе муаллифлик қилди.
«Яна бир қадам ташланди — олдинга интилишда давом этамиз. Майдонга қайтганимдан жуда хурсандман», — деб ёзди Сака баҳс якунлангач ўз ижтимоий тармоқларида.
Ушбу ғалабадан сўнг «Арсенал» «Манчестер Сити»ни уч очкога ортда қолдириб, яна турнир жадвалида пешқадамликни қўлга олди. «Шаҳарликлар»да эса битта захира ўйини мавжуд.
Букайо Сака 22 мартдан бери илк бор майдонга тушди — у жароҳати сабабли бир ойдан ортиқ вақт давомида жамоасига ёрдам бера олмаган эди.
