«Барселона» ярим ҳимоячиси Педрининг ўйини ҳатто рақиб жамоа мухлисларида ҳам ҳайрат уйғотмоқда. 23 ёшли футболчи Ла Лига доирасида шанба куни «Хетафе»га қарши кечган баҳс (2:0) қаҳрамонларидан бирига айланди — у голли узатмани амалга оширди.

Barca Centre хабарига кўра, «Колисеум» стадионига йиғилган томошабинлар «кўк-анорранглилар» ярим ҳимоячисини тик туриб олқишлаганлар. ОАВда «Барса»нинг амалдаги юлдузини Ла Лигада умумий ҳурматга сазовор бўлган ва бошқа жамоалар мухлисларининг олқишларига сазовор бўлиб келган Андрес Иньестага қиёслашди.

Сафарда «Хетафе»ни мағлуб этган Ханс-Дитер Флик жамоаси чемпионликни деярли нақд қилди: чемпионат якунига беш тур қолганда Мадриднинг «Реал» клуби билан орадаги фарқ 11 очкогача кўпайди.