Бугун Ўзбекистон Суперлигасининг 10-тури доирасидаги учрашувлар давом эттирилади. Кун доирасида «Пахтакор» ва «Насаф» клублари ўзаро ҳисоб-китоб қилади.

Азалий рақиблар мавсумни икки хил бошлашди. «Пахтакор» ўзи ўтказган 9 та ўйиннинг 8 тасида ғалаба қозониб, турнир жадвалида пешқадам бўлиб турибди. «Насаф» эса айни вақтда 12 очко билан турнир жадвалида 8-ўринда бормоқда. Қаршиликлар дастлабки 9 та ўйиннинг 3 тасида мағлуб бўлишга улгурди. Жамоа 4 та ўйиндан бери ғалаба қозона олмай келмоқда.

Жамоаларнинг сўнгги 8 та ўйинига эътибор берсангиз, мутлақо тенгликка гувоҳ бўласиз. Ушбу баҳсларнинг 2 тасида аждарларнинг қўли баланд келган бўлса, яна 2 таси шерларнинг муваффақияти билан якунланган. 4 та баҳсда эса кучлар тенг келган.

Хўш, бугун қандай натижа қайд этилади? «Пахтакор» муҳим ўйинда ғалаба қозониб, ўз етакчилигини сақлаб қоладими? Ёки «Насаф» сафарда ғалаба қозониб, грантлар қаторига қайтадими? Бу саволга бугун соат 20:00 да старт оладиган баҳсни томоша қилиш орқали жавоб топамиз.